Missalin.com
Talb Mill-Missal Ruman
Ejjew ndaħħlu din d-drawwa qaddisa, li nitolbu waħda minn dawn it-Talbiet, qabel u wara kull Quddiesa. Dan it-Talb huwa meħud mill-Missal Ruman.
✠
Tħejjija għall-Quddiesa
Talba ta' San Ambroġ
Mulej Ġesù Kristu, jiena, midneb kolni mistħija, riesaq nirtgħod lejn il-mejda tal-ikla divina tiegħek, mhux għall-merti tiegħi imma b'tama fit-tjieba u l-ħniena tiegħek.
Għaliex għandi qalbi u ġismi kollha mtebba' minn ħafna ħtijiet tiegħi, u ma għaraftx inrażżan tajjeb kliemi u ħsibijieti. Għalhekk, o Mulej ta' tjieba liema bħalha, o Alla ta' kobor bla qjies, jiena, imsejken u mnikket taħt it-toqol tal-hemm tiegħi, lejk niġri għax inti l-għajn ta' kull ħniena, lejk inħaffef biex tfejjaqni, lejk naħrab biex ikolli l-ħarsien tiegħek, u nittama li tkun għalija s-Salvatur għax nibża' nidher quddiemek bħala mħallef.
Lilek, Mulej, ngħid in-nuqqasijiet tiegħi, quddiemek nuri l-mistħija tiegħi kollha. Naf li d-dnubieti huma kbar, u huma ħafna, u għalhekk ibeżżgħuni; imma nittama fil-kobor tal-ħniena tiegħek, li hi bla qjies.
Dawwar mela lejja l-għajnejn tiegħek ta' ħniena, Mulej Ġesù Kristu, Sultan ta' dejjem, Alla u bniedem, imsallab għalina l-bnedmin. Isma' t-talb tiegħi li nittama fik; ħenn għalija, mimli dnubiet u miżerja, int li inti għajn ta' ħniena li qatt ma tiġi nieqsa.
Sliem għalik, vittma ta' salvazzjoni għalija u għall-bnedmin kollha, issagrifikata fuq l-għuda tas-salib. Sliem għalik, Demm għażiż u nobbli, li ħriġt mill-pjagi ta' Sidi Ġesù Kristu msallab, biex taħsel u tneħħi d-dnubiet tad-dinja kollha.
Ftakar, Mulej, fija, għax ħlaqtni u fdejtni b'Demmek. Jisgħob bija li dnibt, nixtieq inpatti għal dak li jien għamilt. Missier ħanin, neħħi minni il-ħażen tiegħi kollu u dnubieti kollha, biex, kolni safi f'ruħu u ġismi, jistħoqqli nersaq induq il-ħwejjeġ qaddisa tal-qaddisin.
U agħmel, li din l-ikla mqaddsa bil-Ġisem tiegħek, li jien sejjer nagħmel bla ma jistħoqqli, tagħtina l-maħfra ta' dnubieti, tnaddafni għal kollox minn ħtijieti, twarrab minni kull ħsieb ħażin u kull xewqa ħażina, tnissel fija kull ma hu tajjeb, tagħtini l-qawwa nagħmel dak kollu li jogħġob lilek u tkun għalija ta' ħarsien sħiħ kontra t-theddid kollu tal-għedewwa ta' ruħi.
Amen.
Talba ta' San Tumas ta' Aquino
OAlla ta' dejjem li tista' kollox, ara, jien riesaq għas-Sagrament ta' Ibnek il-waħdieni Sidna Ġesù Kristu, riesaq immiġġes lejn l-għajn tal-ħniena, għama lejn id-dawl ta' dija bla tmiem, fqir u msejken lejn Sid is-sema u l-art.
Nitolbok għalhekk, Mulej, biex, fil-kobor bla qjies tat-tjieba tiegħek, jogħġbok tfejjaqni mill-mard tiegħi, tnaffadni mit-tinġis tiegħi, iddawwal l-għama tiegħi, tneħħili l-faqar tiegħi u tlibbes l-għera tiegħi, biex nirċievi l-Ħobż ta' l-Anġli, is-Sultan tas-slaten u s-Sid tas-sidien, b'qima kbira u b'umiltà sħiħa, b'soġħba mill-qalb u b'tjieba qaddisa, b'safa liema bħalhu u b'fidi mheġġa, b'fehma soda u intenzjoni tajba kif jaqbel għas-salvazzjoni ta' ruħi.
Agħtini, nitolbok, mhux biss nirċievi s-sagrament tal-Ġisem u d-Demm tal-Mulej imma nirċievi wkoll il-grazzja u l-qawwa ta' dan is-sagrament. O Alla l-aktar ħanin, agħtini li nitqarben bil-Ġisem ta' Ibnek il-waħdieni, Sidna Ġesù Kristu, ġisem li tagħtulu il-Verġni Marija, u hekk ikun jistħoqqli nissieħeb mal-ġisem mistiku tiegħu u ningħadd mal-membri tiegħu.
O Missier l-aktar maħbub, agħtini fl-aħħarnett li meta jasal il-waqt nikkontempla għal dejjem wiċċ imb'wiċċ lil għażiż Ibnek li issa f'din il-ħajja għandi l-ħsieb nirċevih taħt ix-xbihat. Hu li miegħek jgħix u jsaltan għal dejjem ta' dejjem. Amen.
Talba lill-Imqaddsa Verġni Marija
O Omm ta' tjieba u ħniena, o Verġni mbierka, Marija, jiena midneb miskin li mingħajr ma jistħoqqli lejk niġi b'qalbi kollha u b'imħabbti kollha, biex nitolbok bil-ħniena ħalli kif darba assistejt lil Ibnek l-għażiż, imdendel mas-Salib, hekk illum jogħġbok tassisti lili midneb, u lis-saċerdoti kollha li hawn u fid-dinja kollha qegħdin iqaddsu llum, biex bl-għajnuna tal-grazzja tiegħek, ikunu jistgħu joffru vittma xierqa li tingħoġob lil Alla wieħed fi tliet Persuni. Amen.
L-Intenzjoni tal-Quddiesa
Talba Tas-Saċerdoti
Irrid inqaddes u nikkonsagra l-Ġisem u d-Demm ta' Sidna Ġesù Kristu skond ir-rit tal-Knisja Kattolika, għat-tifħir ta' Alla li jista' kollox u tal-Knisja kollha trijunfanti, għall-ħtiġijiet tiegħi u tal-Knisja kollha militanti, għal dawk kollha li b'xi mod jew ieħor talbuni t-talb tiegħi, u għall-ġid u l-hena tal-Knisja mqaddsa Kattolika.
✠
Radd il-Ħajr wara l-Quddiesa
Talba ta' San Tumas ta' Aquino
Inroddlok ħajr, Mulej, Missier qaddis, Alla ta' dejjem li tista' kollox, għaliex lili, qaddej tiegħek bla ma tistħoqqli għoġbok tagħtini li nixba bil-Ġisem u d-Demm għażiż ta' Ibnek, Sidna Ġesù Kristu, mhux minħabba xi merti tiegħi, imma għall-ħniena kbira tiegħek.
U nitolbok li din it-tqarbina ma tkunx għalija għemil ta' ħtija li jistħoqqlu l-kastig imma tkun talba ta' salvazzjoni li taqlali l-maħfra. Tkun għalija kurazza ta' fidi u tarka ta' rieda tajba. Tneħħili l-ħażen kollu tiegħi, teqred fija l-ġibdiet ħżiena kollha, u tkattar fija l-imħabba u s-sabar, l-umiltà u l-ubbidjenza, u kull xorta ta' għemil tajjeb.
Tkun ħarsien sħiħ kontra t-theddid tal-egħdewwa kollha tiegħi, sew dawk li jidhru u sew dawk li ma jidhrux; isserraħ fija kull tqanqil, sew tar-ruħ u sew tal-ġisem: tgħaqqadni sħiħ miegħek Alla wieħed u veru u tkun it-tmiem hieni tiegħi kollu.
U nitolbok li twassal lili, midneb, għal dik l-ikla liema bħalha fejn Int ma' Ibnek u ma' l-Ispirtu s-Santu u mal-Qaddisin kollha tiegħek, int dawl tassew, xaba sħiħ, tgawdija bla tarf, ferħ bla tmiem, u hena perfett. Bi Kristu Sidna. Amen.
Aspirazzjonijiet lil Kristu Redentur
Ruħ ta' Kristu, qaddisni.
Ġisem ta' Kristu, salvani.
Ilma tal-kustat ta' Kristu, aħsilni.
Passjoni ta' Kristu, sabbarni.
Ġesù ħanin, ismagħni.
Fil-pjagi tiegħek, aħbini.
Thallinix qatt ninfired minnek.
Mill-għadu ħażin ħarisni.
Fis-siegħa tal-mewt sejjaħli.
Ġewwa ħdanek ilqagħni
biex ma' l-Anġli u l-qaddisin tiegħek
infaħħrek għal dejjem ta' dejjem.
Amen.
Offerta
Ilqa', Mulej, il-libertà tiegħi kollha. Hu l-memorja, il-fehma u r-rieda kollha tiegħi. Kull ma għandi u huwa tiegħi, kollu ngħatali: nagħtihulek kollu lura u nħallih f'idejk biex tieħu ħsiebu skond ir-rieda kollha tiegħek. Agħtini biss imħabbtek flimkien mal-grazzja tiegħek, u nkun għani bil-bosta, u ma nitlob xejn aktar.
Talba lil Ġesù Msallab
Hawn jien, o Ġesù maħbub tiegħi, mixħut għarkubbtejja quddiemek, nitolbok bl-akbar ħrara li tnissel f'qalbi sentimenti ta' fidi, tama u mħabba l-aktar qawwija, kif ukoll indiema kbira ta' dnubieti, u fehma sħiħa li ma nerġax nirgħexek: filwaqt li jiena bl-imħabba u s-soġħba kollha naħseb fuq il-ħames pjagi tiegħek b'dak il-kliem quddiem għajnejja li qal fuqek il-profeta David: "Taqqbuli jdejja u riġlejja, nista' ngħodd għadmi kollu".
Talba Universali
Magħrufa bħala t-Talba tal-Papa Klement XI
Nemmen, Mulej, imma rrid nemmen b'fidi aktar qawwija;
nittama, imma rrid nittama b'tama aktar sħiħa;
inħobb, imma rrid inħobb b'imħabba aktar imħeġġa;
jisgħobbija, imma rrid jisgħobbija b'sogħba wisq akbar.
Inqimek, bħala l-bidu ta' kollox;
nixtieqek b'ħala t-tmiem ta' kollox;
infaħħrek bħala Dak li dejjem tagħmel il-ġid;
nitolbok bħala Dak li żgur tħarisni.
Mexxini bl-għerf tiegħek,
rażżanni bil-ġustizzja tiegħek,
farraġni bit-tjieba tiegħek,
ħarisni bis-setgħa tiegħek.
Noffrilek, Mulej, kull ma naħseb biex ħsibijiet jkunu dejjem fik;
kull ma ngħid, biex kliemi jkun dejjem fukek;
kull ma nagħmel, biex dejjem ikun kif trid int;
kull ma nġarrab, biex ikun dejjem għalik.
Irrid dak li trid int, irridu għax tridu int,
irridu kif tridu int,
irridu sakemm tridu int.
Nitolbok, Mulej, iddawwalli l-fehma,
tħeġġiġli r-rieda,
isaffili qalbi u tqaddisli ruħi.
Jisgħobbija għall-ħtijiet tal-imgħoddi,
imwarrab minni t-tiġrib li għad jiġi fuqi,
inrażżan fija l-ġibdiet ħżiena,
inġib 'il quddiem kull xorta ta' għemil tajjeb.
Agħtini, o Alla ta' kull tjieba,
imħabba għalik u mibgħeda għallija nnifsi,
ħeġġa għall-għajri u stmerrija tad-dinja.
Għinni nħabrek ħa nobdi lis-superjuri tiegħi,
ngħin lil min hu inqas minni,
nieħu pariri mill-ħbieb, u naħfer l-egħdewwa.
Nirbaħ bit-tgħakkis il-ġibda għall-ħażen,
bil-ġenerożità x-xeħħa, bit-tjieba l-korla, bil-ħeġġa l-bruda.
Agħtini l-għaqal biex nagħti pariri tajba,
il-qawwa fit-tiġrib, is-sabar fil-hemm,
u l-umiltà fir-risq it-tajjeb.
Agħmel, Mulej, li nkun miġbur fit-talb,
mejjus fil-kliem, kollni ħeġġa fix-xogħol,
u sod fil-fehma.
Agħtini li nkun bla ħtija fir-ruħ,
rżin fl-imġiba, ta' eżempju tajjeb għall-oħrajn,
u ordnat f'ħajti kollha.
Nishar bla heda biex inrażżan lili nnifsi,
insaħħaħ fija l-grazzja, inħares il-liġi,
u nikseb is-salvazzjoni.
Għallimni kemm ftit jiswa kull ma hu ta' l-art,
x'siwi kbir għandu kull ma hu tas-sema,
kemm jgħaddi malajr kull ma hu taż-żmien,
kemm jibqa' dak li hu għal dejjem.
Agħtini li nkun imħejji għall-mewt
nibża' mill-ġudizzju,
naħrab l-infern, u nikseb il-ġenna.
Bi Kristu Sidna. Amen.
Talba lill-Imqaddsa Verġni Marija
O Marija, Verġni u Omm mqaddsa, jien irċevejt fit-tqarbin il-maħbub Ibnek, li int nissilt fil-ġuf safi tiegħek, willidtu, mantnejtu u għannaqtu miegħek b'imħabba kollha ħlewwa.
Ara, jien qed noffrilek, b'imħabba kbira u bl-umiltà kollha, lil Dak li int kont tiġħaxxaq bid-dehra tiegħu u timtela b'kull ħlewwa, noffrihulek biex tiħdu f'idejk u tħobbu b'qalbek kollha; noffrih lit-Trinità qaddisa bl-aqwa għemil ta' qima għall-ġieh u l-glorja tagħha u għall-ħtiġijiet tiegħi u tad-dinja kollha.
Nitolbok għalhekk, o Omm ħanina, taqlagħli l-maħfra ta' dnubieti kollha, u grazzja fejjieda biex dejjem naqdik bil-fedeltà kollha, u fl-aħħarnett il-grazzja tal-aħħar - biex miegħek inkun nista' nfaħħru għal dejjem ta' dejjem. Amen.
✠
Talb Ieħor
Talba lil San Mikiel
Papa Ljun XIII
San Mikiel Arkanġlu, iddefendina f'dan il-jum tal-battalja!
Kun it-tarka tagħna kontra l-ħażen u x-xbieki tax-xitan.
Aħna, umilment nitolbu, biex Alla jrażżnu u inti, O prinċep tal-Ġemgħa l-Kbira tas-Smewwiet, bis-saħħa ta' Alla, itfa' lil Satana u lill-ispirti ħżiena kollha, li jħufu madwar id-dinja kollha biex iħassru l-erwieħ, fin-nirien tal-infern! Amen.
Talba lill-Anġlu Kustodju
Anġlu ta' Alla Illi,
fit-tjubija tiegħu,
Alla tani biex tħarisni,
Dawwalli moħħi, ħarisni, żommni
u mexxini f'dan il-jum (f'dan il-lejl).
Amen.